Onrus in die gemeenskap van Clocolan oor munisipale landbougrond het daartoe gelei dat ’n boervrou in ’n koma is.
Die 67-jarige me. Isabel Hugo en haar 27-jarige dogter, Elsabe, was onderweg na die dorp van die plaas Daisy af toe Isabel deur betogers met ’n klip teen die kop gegooi is.
Die twee vroue was Maandag (27 Augustus 2012) vroegoggend van die plaas af na die dorp onderweg waar die bakkie waarmee hulle gery het, herstelwerk moes ondergaan. Luidens ’n
berig in
Volksblad het ’n groep oproeriges die bakkie buite die dorp omsingel en Hugo is deur ’n oop ruit met ’n klip teen die kop gegooi.
Hugo het haar bewussyn verloor en die bakkie is van die pad af die veld in. Volgens mnr. Mondli Mvambi, woordvoerder van die departement van gesondheid, het Hugo ernstige beserings aan haar kop opgedoen en is sy in ’n koma. Sy word in die Pelonomi-hospitaal in Bloemfontein behandel.
BetogingVolgens die koerant kom onrus in die omgewing voor sedert die
Setsoto-munisipaliteit verlede week ’n klag van betreding by die Polisie gelê het ná mense plakkershuise op munisipale landbougrond opgerig het. Die grond word aan mnr. Wessel Wessels verhuur.
Die plakkers beweer mnr. Tshediso Jakobo, burgemeester, het hulle toestemming gegee om daar huise op te slaan, maar hy sê hulle lieg.
Altesame 82 mense is verlede week vir openbare geweld en kwaadwillige saakbeskadiging in hegtenis geneem. Nog niemand is aangekeer in verband met die aanval op Hugo nie.
Bron:
Volksblad
