’n Boer wat sonder kind of kraai op sy plaas geleef en geen familielede gehad het nie, het al sy bates in sy testament aan die Abraham Kriel-kinderhuis in Potchefstroom bemaak.

Die waarde van die totale boedel is R35 miljoen. Mnr. At van der Merwe se regsverteenwoordiger sê volgens ’n berig op News24.com die kinderhuis sal sowat R30 miljoen ontvang.
 
Ná Van der Merwe se dood is sy nege plase en besittings vir R26 miljoen verkoop. Dít het nie sy inkomste vir sy oes, sy beleggings of sy voertuie ingesluit nie.
 
Van der Merwe is in April vanjaar wreed op sy plaas aangeval. Hy is met sy hande vasgebind op die vloer van sy studeerkamer op die plaas Leeubos gevind. Hy is aan ernstige kopbeserings dood. Lees meer oor die voorval hier.
 
Lê wakker
Me. Catharien Saayman, hoof van die kinderhuis, sê sy kan nie glo dat Van der Merwe sy boedel aan hulle nagelaat het nie. “Ek kon dit nie glo nie. Ek lê baie aande wakker, en elke nou en dan kyk ek na die testament op my bedtafeltjie. Ons is ongelooflik dankbaar.”
 
Van der Merwe het glo soos ’n kluisenaar op sy plaas geleef. Hy was nie getroud nie, en het nie kinders gehad nie. Sy twee susters is albei oorlede.
 
Geen verbintenis het tussen Van der Merwe en die kinderhuis bestaan nie. Hy het wel eenkeer opgemerk, toe hy gevra is om geld in ’n blikkie vir die kinderhuis te gooi, dat hy nie toe iets sal gee nie, want “eendag sal hulle genoeg kry.”
 
Niemand is nog in verband met sy moord aangekeer nie.

Bron: News24.com