Die vier mans wat gevonnis is, was volgens ’n regter “tot die tande toe” gewapen. Elke lid van die groep is meer as 140 jaar tronkstraf opgelê. Tydens die voorval op 8 Augustus 2008 op die pad tussen Bloemfontein en Petrusburg is mnr. Piet de la Rey, ’n boer van Mokopane, in die bors getref. Hy is op die toneel dood.

Luidens ’n berig in Beeld was die vier rowers deel van ’n groep van 15 tot 20 rowers wat “met militêre presisie” ’n geldwa en die sekerheidsvoertuig wat dit begelei het, van die pad gestamp het en van sowat R2,5 miljoen probeer beroof het. De La Rey en sy 35-jarige seun Jean, wat saam met sy pa geboer het, het in die rigting van ’n voertuig met vier rowers gery toe hy in die bors geskiet is.

Vonnisse
Die Vrystaatse Hooggeregshof het Khethane Nkabinde van Krugersdorp verlede week 152 jaar lank tronk toe gestuur. Saam met dié vonnis is hy ook lewenslange tronkstraf opgelê. Papi Makgele van Sharpeville, Aubrey Dikobe van Pretoria en Orapeleng Mokgoje van Thaba Nchu is elkeen ’n vonnis van 147 jaar, asook lewenslange tronkstraf, opgelê. Die vonnisse sal samelopend met die lewenslange tronkstraf uitgedien word.

Die vier mans is op aanklagte van moord, vier aanklagte van poging tot moord en vyf aanklagte van roof met verswarende omstandighede skuldig bevind. Nkabine se vonnis is vyf jaar langer omdat hy ook skuldig bevind is aan die steel van een van die voertuie wat tydens die rooftog gebruik is.

Die groep is ook skuldig bevind aan oortredings wat verband hou met die onwettige besit van wapens en ammunisie, asook vir oortredings ingevolge die Wet op Plofbare Stowwe.

Bron: Beeld


Kyk gerus na 'n kaart van Suid-Afrika om meer te leer oor misdaad-statestiek.