'n Brug op mnr. Christo van der Walt se plaas Skurwekop het op 9 Junie verlede jaar tydens ’n vloed weggespoel.

In Februarie het hy, sy vrou, haar ma en twee werkers ’n noue ontkoming gehad toe hulle die rivier wat in vloed was, wou oorsteek en die trekker met sleepwa byna weggespoel het.

Ondanks herhaalde vertoë wat die landbouvereniging Post Retief aan die Oos-Kaapse departement van vervoer gerig het, kon geen definitiewe antwoord kry wanneer die brug herstel sou word nie.

Nuwe brug
Drie weke gelede het nege boere van die omgewing wat daagliks die pad gebruik, egter besluit om ’n nuwe brug te bou. Dit het hulle sowat R50 000 gekos. Maar net twee dae ná die nuwe brug voltooi het, is hulle in kennis gestel dat die Oos-Kaap se departement van vervoer ’n kontrak van R250 000 goedgekeur het om ’n nuwe brug te bou.

“Ons weet nie of die Departement ons sal vergoed vir die werk wat ons gedoen het nie. Die brug wat ons gebou het, is baie sterk. Indien die departement dit nie doen nie, hoop ons dat die geld gebruik sal word om die pad op die sirkelroete te herstel wat in ’n baie swak toestand is,” sê Van der Walt.