Veediefstal in Suid-Afrika is geheel en al buite beheer en die impak daarvan bedreig die
volhoubaarheid van veeproduksie in die meeste van die provinsies. In ’n verklaring beskryf die
Rooivleisbedryfforum (RMIF) dié misdaad as ’n winsgewende onderneming.
Boere, spekulante,
veeveilings,
voerkrale en
slagplase kan sonder dat hulle daarvan bewus is gesteelde vee ontvang en skuldig wees aan ’n misdaad. Vanweë die ernstige aard van die misdaad en die ekonomiese impak daarvan, het die forum ’n strategiese ondersteuningsplan bekend gemaak om dit te voorkom.
Gevolglik doen die forum ’n beroep op alle rolspelers om die strategie te ondersteun en seker te maak dat hulle help om die misdaad te voorkom.
Dringende versoek“Dit wil voorkom of ’n groot deel van die
veebedryf nie aan die voorskrifte en bepalings van dié wette (die wette wat reeds vir veediefstal bestaan) voldoen nie en dus nie voldoen aan die regulasies om veediefstal te voorkom nie,” aldus die RMIF.
Volgens kol. Oosie Oosthuizen, hoof van die land se veediefstaleenhede, is die nakoming van die
Wet op die Identifikasie van Diere (Wet 6 van 2002) en die
Wet op Veediefstal (Wet 57 van 1959) belangrik wanneer so ’n misdaad ondersoek word. “Die suksesvolle ondersoeke met betrekking tot veediefstalsake is afhanklik van die positiewe identifikasie van gesteelde vee en om eienaarskap in die hof te kan bewys.”
Met dié stellings in gedagte vra die forum eienaars om seker te maak dat hul vee volgens die voorskrifte van die Diere-identifikasiewet gebrandmerk word. Verder moet eienaars seker maak dat dokumentasie vir identifikasie en die vervoer van vee alle transaksies vergesel.
Aan alle veekopers, veeveilings, voerkrale en slagplase vra die forum om te weier om vee in hul besit te neem sonder dat die nodige dokumentasie die vee vergesel. Alle rolspelers moet ook seker maak dat dié dokumentasie vir 12 maande bygehou word.
Die forum vra verder dat alle veediefstaleenhede die wette streng moet toepas, veral vanaf 1 Januarie 2013. Die forum meen as die wette deur alle rolspelers toegepas word, meer veediewe aan die pen sal ry.
