Brandstofpryse sal Woensdag (5 September 2012) met 8,4% styg, wat die prys van 95 oktaan-petrol in Gauteng op R11,97 per liter te staan sal bring. ’n Brandstofprysstyging van 93c per liter vir petrol en 69c per liter vir diesel is deur die Departement van Energie aangekondig.
 
Dié prysskok kan nié net aan hoë internasionale oliepryse toegeskryf word nie, maar luidens ’n berig op Fin24.com is dit ook die gevolg van ’n loonsverhoging aan petroljoggies.
 
Die prys van diesel sal in September rondom R10,95 per liter wees.
 
Nog hoër
Mnr. Dawie Roodt, senior ekonoom by die Efficiënt-groep, sê verdere verhogings kan in Oktober voorkom. Hy voorspel dat die brandstofpryse dan met tussen 20c en 30c per liter kan styg.
 
“Dít kan aan ’n sloeringseffek toegeskryf word. Die verswakking in die rand die laaste twee weke is nie in September se prys ingereken nie, en sal dus in Oktober se prys ingereken word,” verduidelik Roodt.

Hy sê die wisselvalligheid van die rand teenoor die dollar kan egter daartoe lei dat dié swak vertoning uitgeskakel word, wat dan ’n goeie invloed op brandstofpryse kan hê.
 
Bron: Fin24.com