Die verslag oor hidrobreking en skaliegasontginning in Suid-Afrika moet bekend gemaak word, sê die Demokratiese Alliansie.

Luidens ’n mediaverklaring is die party van plan om druk op me. Susan Shabangu, Minister van Energie, te plaas tot sy die verslag bekend gemaak het.

Ná regsaksie deur die Treasure the Karoo Aksiegroep (TKAG) het Shabangu vroeër vanjaar aangedui dat die verslag teen 31 Maart 2012 afgehandel sal wees. Intussen was daar egter nog geen sprake oor of die verslag voltooi is en wat die inhoud daarvan is nie.

Mnr. David Ross, woordvoerder vir die party, sê hy sal ’n brief aan die minister rig om vir die onmiddellike bekendmaking van die verslag te vra.

Die party sê die minister moet ook verduidelik hoekom verteenwoordigers van die Departemente van Energie en van Landbou, Bosbou en Visserye nie ingesluit is in die taakspan wat die verslag saamgestel het nie. Shabangu het dié taakspan verlede jaar aangewys ná ’n moratorium op die gebruik van dié mynmetode asook die myn van skaliegas in die land afgekondig is.

Raaiselagtig
Die party beskryf die situasie, waarvolgens geen kommunikasie tans oor die verslag en die moratorium plaasvind nie, as raaiselagtig.

Verlede week is in mediaberigte beweer dat die Batho Batho-trust, wat bande met die ANC het, 51% in Shell se plaaslike bemagtigingsbeen, Thebe Investments, besit.

Shell het verlede jaar aansoek gedoen om prospekteerregte vir skaliegasontginning in die Karoo. Deur middel van dié verbintenis besit die trust aandele in die oliereus se raffinadery en bemarkingsafdeling.

“As die staat aantygings in die kiem wil smoor dat hy die verslag oor hidrobreking vertraag omdat die gevolgtrekkings daarin nie die finansiële agenda van die ANC-verbonde trust bevorder nie, sal Shabangu die verslag sonder vertragings bekend maak,” aldus Ross.

16 April 2012