Dit sou wydverspreide voordele vir veral, maar nie uitsluitlik nie, ontwikkelende lande inhou, het me. Mariann Fischer Boel, die Europese Unie (EU) se minister van landbou en landelike ontwikkeling, op die Wêreldvleiskongres in Kaapstad gesê.

Sy sê die EU het alles in sy vermoë gedoen om 'n ooreenkoms beklink te kry, maar sy het die indruk gekry daar was mense van die EU se vleisbedryf wat 'n sug van verligting geslaak het.

Uitdagings en welslae

"Die vleisbedryf het nou voorspelbaarheid en bestendigheid nodig wat nie deur die mislukking van dié onderhandelings bevorder word nie," het sy gesê.

Sy het verwys na die EU se vleisbedryf wat gesteier het onder malbeessiekte, maar nou feitlik herstel het. Volgens haar is dit jammer dat daar lande is wat dié siekte nou nog gebruik om Europese vleis uit hul lande te weer.

Die bedryf staan voor wesentlike uitdagings, maar dit moet nie die welslae versluier wat behaal is ten opsigte van voedselveiligheid nie. Met verwysing na die ontwrigting van Brasilië se vleisuitvoer na Europa het sy gesê enigeen wat vleis na die EU wil uitvoer, moet aan hul veiligheidstandaarde voldoen, want die standaarde is nie onderhandelbaar nie.

Landbouweekblad, 19 September 2008