Beter paaie in Gauteng is “ ’n lig in die tonnel” vir boere wat veral vars produkte na Johannesburg en ander afsetpunte in Gauteng moet vervoer, aldus Agri SA. Die organisasie sê hy sal wel die bes moontlike tariewe vir vragmotors wil beding met die komitee wat die tariewe van die e-tolstelsel bepaal.

Mnr. Johan Pienaar, adjunk- uitvoerende direkteur, sê boere moes nog altyd grootskaalse onkoste aangaan om weens swak paaie – veral vanaf die noorde van die land – hul produkte by afsetpunte in Gauteng te kry. Die organisasie het verlede jaar bepaal, gebaseer op die aanvanklike voorgestelde tariewe, dat e-tolgeld die landbou tussen R3 miljoen en R6 miljoen per jaar ekstra sal kos om vars produkte na Johannesburg te vervoer.

Dié stellings volg nadat die Grondwethof Donderdag 20 September 2012 die interdik, wat die instelling van die e-tolstelsel in Gauteng verhinder het, ter syde gestel het. Luidens ’n berig op Nuus24.com is die interdik op 28 April deur die Hooggeregshof in Pretoria aan die Opposition to Urban Tolling Alliance (Outa) toegestaan.

Belasting

Pienaar sê as die geld vir die verbeterde paaie nie volgens die stelsel ingevorder word nie, sal dit by die land se algemene belasting of brandstofbelasting ingesluit word – wat gaan beteken dat alle belastingbetalers moet betaal vir die paaie in een geografiese gebied.

Die uitspraak beteken dat Sanral die tolgelde effektief van Vrydag 21 September 2012 af mag begin hef, maar luidens Nuus24.com is dit egter hoogs onwaarskynlik dat dit so gou gehef sal word.

Intussen het Cosatu volgens News24.com aangedui hy is vasbeslote om die instelling van dié tolgeld teen te staan. “Ons gaan dit teenstaan met elke moontlike mag wat ons het,” aldus mnr. Zwelinzima Vavi, sekretaris-generaal. “Cosatu is steeds vasbeslote om die e-tolgeld op straatvlak teen te staan. Die mobilisering is nie verby nie.”

Bronne:

Nuus24.com 

News24.com