Altesame 455 renosters is tot dusver dié jaar vir hul horings in Suid-Afrika van kant gemaak. Dít is die nuutste statistiek wat die Departement van Omgewingsake en Waterwese bekend gemaak het. Volgens dié syfer word een renoster tans elke 15 uur in die land doodgemaak.
 
Die jaar se statistiek tot dusver is reeds hoër as die aantal renosters wat in totaal in 2010 en 2011 doodgemaak is, wat onderskeidelik 333 en 448 was.
 
Altesame 272 renosters is vanjaar al in die Kruger Nasionale Park (KNP) vir hul horings doodgemaak. KwaZulu-Natal, Limpopo en Noordwes is die provinsies wat die hardste getref word met 150 renosters wat al in dié provinsies doodgemaak is.
 
Verdagtes
Sedert begin vanjaar is 207 verdagtes weens stroping aangekeer. Verlede jaar en in 2010 is onderskeidelik 232 en 165 verdagtes in hegtenis geneem. Die meeste verdagtes is oor die drie jare in die KNP aangekeer.
 
Mpumalanga is die provinsie waar die meeste in hegtenisnemings, 57, al vanjaar aangeteken is. Limpopo en Gauteng is tweede en derde op dié lys met onderskeidelik 34 en 26 inhegtenisnemings.