Wildstropery is ’n geweldige groot probleem in die Buffelsdrift-bewarea, noord van Pretoria, en die gemeenskap het besluit om saam te werk om dit hok te slaan.

’n Projek is onderneem om die omgewing strategies te patrolleer, en volgens ’n verklaring het die patrollies afgekom op verskeie strikke. Karkasse van diere wat in die strikke gevang is, is ook gevind.

Mnr. Dicks Dietrichsen, lid van AfriForum se Kameeldrift-Oos tak, hoewel die misdaad ’n groot uitdaging is, lê die oplossing by die plaaslike gemeenskap.

“Die omgewing en sy dierelewe is ons erfenis. Dit is ons verantwoordelikheid om op te staan vir dié wat nie ’n stem het nie. Wildstropery is ’n misdaad en diegene wat hulle daaraan skuldig maak, sal ook so gehanteer word,” aldus Dietrichsen.

Ander gemeenskappe
Dietrichsen sê die organisasie moedig ander gemeenskappe aan om betrokke te raak om die kwessie van wildstropery aan te pak. “AfriForum doen ’n beroep op gemeenskappe om daadwerklik op die uitkyk te wees vir strikke op kleinhoewes en plase en om dit te verwyder.”

Die organisasie en die Buffelsdrift-bewarea het diegene wat aan die patrollie deelgeneem het, opreg bedank. Die Suid-Afrikaanse Polisiediens se Landelike Beveiligingseenheid, die Tshwane-Metropolisie se Berede-eenheid, Gauteng Natuurbewaring, lede van Praesidium-buurtwag, inwoners van die bewarea en gemeenskapslede wat buite die bewarea woon, het aan die patrollie deelgeneem.

Dietrichsen sê verdere ondersoek gaan ingestel word om te bepaal op watter ander maniere wildstropery in die gebied voorkom kan word.