Nadat die staat etlike miljoene rande vermors het op een van die duurste en, na bewering, ongeldige grondeise in die geskiedenis van restitusie, kan grondeienaars vir die eerste keer in meer as 11 jaar ontspan.

’n Hofstryd van langer as vier jaar wat grondeienaars in Mpumalanga miljoene rande gekos het, is nou bygelê. Altesame 42 Onderbergse boere kan nou weer planne vir die toekoms beraam nadat die eisers afstand gedoen het van die eise op hul grond.

Wat later as die Tenbosch-eis bekend geraak het, is in 1999 gepubliseer. Grondeienaars het dit teengestaan en dit het ses jaar later met ’n groot gesukkel in die Grondeisehof beland.

Saam met die boere het instansies, soos Malelane Sitrus Koöperasie en Ngwenya Lodge, in die Onderberg-gebied in Mpumalanga geveg vir die behoud van hul grond. Volgens die eienaars het die eisers die grond onregmatig vir restitusie geëis.

Die saak het onaanvaarbaar uitgerek met eisers en nuwe eisers wat mekaar op  belastingbetalerskoste toegetakel het vir die grond, terwyl die grondeienaars op eie koste by hul mededinging betrek is.

Die saak het verlede week tot ’n einde gekom met ’n ooreenkoms tussen die grondeienaars en die eisers. Mnr. Bertus van der Merwe het die saak sedert 2003 namens die grondeienaars behartig. Die saak is in 2006 na die Grondeisehof verwys.

Van der Merwe sê dié ooreenkoms sal hopelik binnekort ’n finale bevel van die hof gemaak word. Die eisers het egter aangedui dat hulle steeds in ’n stryd met die kommissie gewikkel is om vergoeding in die plek van die grond wat geëis is.

15 Februarie 2011