As baie nat toestande in September, Oktober en November vanjaar voorkom, is die kans vir ’n El Niño-weerverskynsel in die somer baie groot.

Mnr. Johan van den Berg, klimatoloog by Santam Agri, het op die AMT-vooruitskouings konferensie in Pretoria gewaarsku dat boere versigtig moet wees vir die tweede deel van die seisoen as dié situasie voorkom.
 
“Indien dit nie voorkom nie, is die kans vir goeie reën in die tweede helfte van die seisoen baie groot,” aldus Van den Berg. “Onthou ook, die voorkoms van El Niño is geen waarborg vir droogte nie, maar dit verhoog die risiko vir droogte veral in die sentrale en westelike dele.”
 
Produksie
Van den Berg sê die El Niño -verskynsel het, interessant genoeg, nie noodwendig ’n slegte invloed op oeste nie. “Die vier droogste jare sedert die 1991/’92-boekjaar was ’n gevolg van El Niño, maar die vier jare wat sedertdien die grootste oeste gelewer het, was ook El Niño-jare.”
 
Die sterk winde wat in Augustus en in die begin van September in die land voorgekom het, is ’n aanduiding dat El Niño reeds ’n invloed op die weerstoestande het, sê van den Berg. “So, daar is ’n goeie moontlikheid vir reën in die komende maande.”