Hoewel daar ’n behoefte aan grondhervorming in die land is, het die tyd aangebreek dat politiek en die voortdurende vergelykings tussen wit kommersiële boere en swart opkomende boere beëindig word, het mnr. Ernest Pringle, voorsitter van Agri Oos-Kaap, gevra.

Hy het op ’n boeredag op Kleinpoort gesê dat daar in 1910 net ses miljoen mense in die land was. Die grond en drakrag in die destydse tuislande was genoeg vir die bevolking daar. Die klein getal wit boere het hoofsaaklik in die droër dele van die land geboer.

“Ongelukkig is die nodige aanpassing nie gemaak om vir die veranderde demografie voorsiening te maak nie. Dit moet nou gedoen word. Dit is egter jammer dat daar in die proses steeds sondaars gesoek en uitsprake gemaak word dat wit mense grond van swart mense gesteel het.”

Restitusie terug tot voor 1913?
Volgens Pringle wil mnr. Gugile Nkwinti, Minister van Landelike Ontwikkeling en Grondhervorming, toelaat dat restitusie tot vóór 1913 oopgestel word om slegs vir die eise van San- en Koisan-mense voorsiening te maak.

Maar daar is ook druk op hom om dit vir swart mense terugwerkend tot daardie datum te doen. “As dít gebeur, kan dit nóg 30 jaar duur om die kwessie af te handel. Dit sal soos ’n sweer wees wat voortdurend oopgekrap word en is nie in belang van die toekoms van Suid-Afrika nie.”

’n Pluspunt is egter die ANC se amptelike standpunt dat die private eienaarskap van grond binne die proses van herverdeling eerbiedig sal word en dat daar nie sprake van nasionalisering is nie. “Nkwinti het reeds toegegee dat baie geld gemors is met die grondherverdelingproses sedert die demokratisering van die land.”