“Moedeloos verby” is hoe mnr. Theuns Kotze van die plaas Willemsrivier sy gemoedstoestand beskryf.

Die mees onlangse slagting het verlede Donderdagnag (14 Junie 2012) plaasgevind. Kotze vertel dat sy plaasbestuurder gereageer het op ’n alarm om een van die ooie se nekke wat afgegaan het.

Die bestuurder het op twee honde afgekom wat besig was om skape dood te byt, en het een gewond. Die honde het by vier kampe ingekom en 31 skape – 28 lammers en drie ooie – doodgebyt.

Die honde is Vrydag (15 Junie 2012) deur die Polisie doodgeskiet.

Grensheinings
Kotze sê sy plaas grens aan twee informele nedersettings, en niemand het respek vir grensheinings nie. “Die mense kap eenvoudig die draadheinings plat, dan loop hulle waar hulle wil en die honde ook.”

Die oplossing wat die meeste mense gee, is dat Kotze eenvoudig die honde wat hom skade aandoen, moet doodskiet. “Almal sê skiet dood, maar die honde is so skelm - as hulle die bakkie sien, los hulle die bytery net so en hardloop terug na hul huise toe. Op die persoon se eiendom mag jy niks doen nie, dan is jy die skuldige.”

“Ek skryf hierdie brief aan julle want ek glo dis ’n landwye probleem. Ek kyk na my diere en pas hulle op. Al wat ek vra, is dat hulle dieselfde doen,” aldus Kotze.

Die Hantam-munisipaliteit het Kotze Vrydag ingelig dat iemand hom op sy plaas sal besoek om die situasie te ondersoek, maar nog niemand het besoek by hom afgelê nie.