’n Landbou-vakleerling wat ’n belowende toekoms gehad het, is vermoor buite Greytown in KwaZulu-Natal gevind.

Die 18-jarige mnr. Mduduzi Majola is, volgens lt. Joey Jeevan, polisiewoordvoerder, met ’n wond aan sy kop en ’n draad om sy nek gevind. Sy selfoon, klere en sowat R1 500 se kruideniersgeld is glo gesteel.
 
Luidens ’n berig op News24.com was Majola Vrydag (27 Julie 2012) op pad na sy suster in Ixopo toe hy vermis geraak het. Sy loon is kort voor sy vertrek in kontant aan hom betaal. Sy ligaam is deur plaaswerkers gevind.
 
Verlies
Majola se pa, mnr. Malangela Majola, beskryf sy dood as ’n groot terugslag. Majola sê sy seun was ’n harde werker wat ’n belowende toekoms voor hom gehad het.
 
Majola het op mnr. Mark Hauff se plaas grootgeword, waar sy pa werk. Hauff het Mduduzi gehelp om skool toe te gaan. Volgens Hauff se dogter, Linda, het haar pa altyd die plaas aan Mduduzi oorgelaat wanneer hy met vakansie gegaan het.
 
Mduduzi was besig met opleiding om ’n boer te word, en sou in Januarie volgende jaar na Californië gaan waar hy ’n internskap sou voltooi.
 
Bron: News24.com