Daar is ANC-parlementslede wat mnr. Julius Malema, geskorste jeugleier, as ’n “fabrieksfout van die ANC” bestempel. Hy stem nie saam nie, sê dr. Pieter Mulder, leier van die VF Plus en Adjunkminister van Landbou, Bosbou en Visserye. Hy het op die kongres gesê Malema is grootgemaak op onverantwoordelike en wilde politieke stellings deur die ANC – soos dat “alle grond deur wittes gesteel is” en “alle boere behandel hul werkers sleg”. “Daarom is Malema wat hy is.” Hy sê dit is ’n regering se verantwoordelikheid en taak om die regte feite op die tafel te sit en daarvolgens besluite te neem. “Talle besluite is egter bloot op propaganda gegrond en nie op feite nie.”

Boere moet deelneem aan gesprek.
Volgens Mulder moet boere voortgaan om hul saak op alle vlakke te stel. “Julle het ’n goeie saak. Stel dit aan die media, die Regering, die departement en selfs internasionaal.” Boere moet ook hul eie toekoms skep en nie wag op ander om dit te doen nie. Sonder kommersiële boere sal die land se probleme net groter word. Hy sê daar is verskeie lande in Afrika wat dit nou besef en Suid-Afrikaanse boere is ’n gesogte “invoerproduk”.