Hy wag vir dinamika onder melkboere om met planne en voorstelle vorendag te kom, maar daar is bitter min van hulle. “Boere sit net,” het mnr. Deàn Kleynhans, voorsitter van die Melkprodusente-organisasie (MPO), op ‘n melk-inligtingsdag op Witsand gesê.
Kleynhans het dit duidelik gestel dat hy meer dinamika in die geledere van die melkboere verwag het. Melkboere se aandeel in die verbruikersrand het in die laaste 12 jaar vanaf 43% tot 34% gedaal. Dit veroorsaak die uittog en dit maak die bedryf seer.
Produsente moet ingestel wees om nie net op produksie te fokus nie, maar op die totale waardeketting van sy produk. Die ongeluk is dat baie boere min of niks van dié waardeketting verstaan nie. “En jy kan nie sinvol onderhandel as jy nie verstaan hoe dit werk nie,” het hy gesê.
Kleynhans het ook ’n beroep op produsente gedoen om meer saam te werk en aan te pas by die bemarking van hul produkte. Hy het produsente gevra om beter planne te beraam. Betrek kundiges indien nodig, maar kry net planne bymekaar.
Mnr. Gielie de Kock, organiseerder van die verrigtinge, het gesê boere in die suidelike deel van die Wes-Kaap het vier opsies, naamlik om aan te gaan soos nou en aan te hou agteruitboer, om by klein suiwelverwerkersfabrieke in te koop en aan hulle te lewer, om hul eie verwerkingsaanleg van die grond af te begin, of om die verwerkingsreus, Parmalat “oor te neem”.
15 Augustus 2011
