Verwoestende haelstorms met hael tot so groot soos golfballe, wat twee weke gelede in dele van Gauteng voorgekom het, het meestal groenteboere hard geslaan. Vier plase het in die besonder groot skade gely, nl. Plantation Farms, Costa Farms, Goncalves Farms en die De Freitas-boerdery .
 
Die plase se aanvanklike skadebepalings is op sowat R1,45 miljoen bereken, met sowat R500 000 van dié skade by Plantation Farms, terwyl Costa Farms en Goncalves Farms se skade elk op R400 000 beraam is. Mnr. Dirk Hanekom, hoof uitvoerende bestuurder van Agri Gauteng (Agri GP), sê deeglike opnames wys dat die skade op dié plase asook elders in die provinsie sowat R4 miljoen is.
 
Hulp
Hanekom sê hulle het die betrokke boere gevra vir ’n deeglike opname van al hul skade sodat die organisasie namens hulle by verskaffers van produksiemiddele om hulp vir saad en kunsmis aansoek kan doen. “Ons het die boere gevra om hul skade te konsolideer, want al kan ons nie om ramphulp aansoek doen nie, kan ons wel vir hulp vra.”
 
Verskeie boere in die provinsie het al mielies aangeplant, maar Hanekom sê dié plantjies is jonk, en mielieboere het min skade gely.