Boere in Suid-Afrika moet die feit dat hulle met die Regering kan skakel en kan praat waardeer, sê die Commercial Farmers' Union (CFU).

Mnr. Hendrik Olivier, direkteur, sê vir die afgelope 12 jaar het hulle nie dié geleentheid gehad nie. Hy het ’n groeteboodskap van dié organisasie aan afgevaardigdes by Agri SA se jaarkongres oorgedra.

Volgens Olivier is hulle egter meer positief oor die veranderinge wat hulle die afgelope tyd ervaar. “Stadig maar seker gaan die deure weer oop, ons kan weer skakel en ons gaan ook begin deure afskop om terugvoer te kry.”

Grondgrype gaan steeds voort
Olivier sê intussen gaan grondgrype steeds voort in die buurland, en hy verwag nie dat dinge voor die einde van die jaar makliker gaan raak nie. “Ons gaan vir die volgende sewe maande deur ’n moeilike tyd gaan met die verkiesing wat voorlê, maar ons hoop dinge gaan volgende jaar draai.”

Intussen gesels die CFU met die Zimbabwese regering om die landbou na sy voormalige glorie te herstel. Olivier sê hulle het reeds gunstige terugvoer van die regering oor die plan ontvang.