Graan SA se Nampo-Oesdag het vanjaar gespog met bywoningsyfers om op trots te wees!

Volgens Graan SA het 71 723 mense vanjaar die Oesdag besoek. Die hoogste vergelykbare vorige bywoningsyfer was 2010 se 68 900. Verlede jaar was daar wél meer besoekers, maar weens die verkiesing was daar ’n openbare vakasiedag wat tot ’n buitengewone toeloop gelei het.

Mnr. Cobus van Coller, voorsitter, sê gunstige weerstoestande het bygedra tot vanjaar se sukses. “Die algemene terugvoering van uitstallers is dat hulle goeie sake gedoen het. ’n Hele paar van die meganisasie-uitstallers meen dit was van hulle beste jare tot nog toe.”

Mnr. Jannie de Villiers, uitvoerende hoof van Graan SA, sê die plaaslike en internasionale belangstelling in die Oesdag is ’n teken daarvan dat dit nie net ’n handelsplatform skep nie, maar gereken word as ’n plek vir gesprekvoering en netwerkvorming.

Twee nuwe toevoegings tot die Oesdag was die bekendstelling van ’n ploegkompetisie en ’n Oesdag-radiostasie, Graan SA Radio. ’n Ploegkompetisie, geskoei op die wêreldploegkampioenskapsbyeenkoms, sal by volgende jaar se Oesdag aangebied word en die radio-diens sal waarskynlik weer besoekers op die hoogte van gebeure hou.

Nampo-Oesdag 2013 sal van 14 Mei tot 17 Mei aangebied word. Kyk hier na 'n video oor vanjaar se Nampo-Oesdag.