90 000 werk nie meer op plase

Altesame 33 000 plaaswerkers op kommersiële plase het hul werk van Maart verlede jaar tot September verlede jaar verloor, volgens die jongste ondersoek deur Statistiek SA (SSA).

In die informele boerderysektor is die verlies aan werksgeleenthede in dié ses maande veel meer, naamlik 58 000. Dit beteken 'n totaal van 91 000 plaaswerkers het in dié tyd hul werk verloor.

Die SSA sê in sy jongste verslag dat daar na raming in Maart verlede jaar sowat 865 000 plaaswerkers op kommersiële plase was. Teen September het dié syfer tot sowat 832 000 gedaal. In Maart was daar 423 000 werkers op informele plase, maar teen September verlede jaar het dit tot net 365 000 gedaal.
Dr. Ros Hirschowitz, adjunk-direkteurgeneraal van die SSA, het tydens die bekendstelling van die syfers gesê dit is statisties onbeduidend.
Die totale werkloosheidsyfer verlede jaar in September was 28,2 % van die totale werksmag, nadat dit ses maande vroeër 31,2 % was. Die SSA beskou dié afname, wat volgens die amptelike definisie van werkloosheid bereken is, as statisties beduidend.
Volgens dié statistieke het die mense wat ekonomies onaktief is, met meer as een miljoen toegeneem. Dit is mense wat moed opgegee het om werk te soek, het dr. Hirschowitz gesê.
Die amptelike definisie van werkloosheid sê dit is mense van 15 tot 65 jaar oud wat in die maande voor die opname gedoen is, na werk gesoek het.
Daar word in die statistieke gepraat van 'n uitgebreide definisie wat daardie werkloses insluit wat nog wil werk, maar nie werk kan kry nie en gevolglik uit pure moedeloosheid opgehou het met werk soek. Volgens dié definisie staan die werkloosheidsyfer op 41,8 %. Ses maande vroeër was dit 42,1 %.
Volgens mnr. Pieter Groenewald, hoofwoordvoerder oor arbeid van die Vryheidsfront Plus, weerspieël die amptelike werkloosheidsyfer van die SSA nie die werklikheid nie en word die land mislei oor wat die werklike syfer is. Hy sê mense bly werkloos — al het hulle 'n maand voor die opname werk gesoek of nie.
Hy het verwys na die werksverlies van 91 000 plaaswerkers en gesê dit is 'n bewys dat die instelling van die minimum loon vir plaaswerkers meer werkloosheid veroorsaak. 9 April 2004