Aanbod vir KWV-aandele

Die swart bemagtigingskonsortium, Phetogo Beleggings, het 'n koopaanbod van R1,85 per gewone uitgereikte aandeel aan aandeelhouers van KWV Beperk gemaak om 'n beoogde 25,1 % aandeel in dié maatskappy te bekom. Die transaksie is nagenoeg R200 miljoen werd.

Volgens dr. Willem Barnard, hoof uitvoerende beampte van die KWV, sal die KWV voor einde Junie 'n proporsionele aanbod aan ál sy aandeelhouers maak om 25,1 % van hul aandele te koop. "Ons is in 'n posisie om die aanbod te maak en het alle nodige finansiële reëlings getref."

Hoewel die geld beskikbaar sal wees, het mnr. Victor Christian, voorsitter van die konsortium en 'n nuwe direkteur van KWV, gesê hy is nie in 'n posisie om bekend te maak wie die transaksie gaan finansier nie.

Aandeelhouers sal 21 dae gegun word om daarop te reageer en as daar aandeelhouers is wat nie hul aandele wil verkoop nie, sal ander aandeelhouers toegelaat word om meer as 25,1 % te verkoop. Barnard het gesê aandele sal uitgereik word as hulle nie die beoogde proporsie aandele van hul aandeelhouers kan koop nie.

Hy het ook gesê dat daar aanduidings is dat hul aandeelhouers die moontlikheid van aandele-uitreiking positief sal oorweeg.

In reaksie op 'n vraag oor die koopaanbod wat laer is as die KWV se netto batewaarde, het Barnard gesê hulle beskou dit as 'n "vriendelike aanbod" in belang van die maatskappy.

'n Tweede direkteur uit bemagtigingskonsortiumgeledere sal oor drie maande aangestel word.