Abattoirs onder druk

Die Rooivleisabattoirvereniging (RVAV) het versoek dat 'n standaard vir omgewingsbestuur vir dié bedryf opgestel word.

Mnr. Charles Fourie van die onderneming Ecosat het op die vereniging se jaarlikse konferensie in Somerset-Wes gesê die bedryf kan nie die omgewingsregte wat in die Grondwet verskans is, verander nie. Hy moet ook nie verwag dat die Regering dit vir hom makliker gaan maak nie.

Hy het gesê die beginsel van "die besoedelaar betaal" raak elke abattoireienaar, ongeag van hoe groot of klein sy abattoir is. Die eienaar bly aanspreeklik, al maak hy van 'n subkontrakteur gebruik.

Fourie meen abattoireienaars moet bewus wees van die presiese impak wat hul abattoirafval op die omgewing het en maatreëls in plek hê om dit so goed moontlik te bestuur. Daarom is 'n omgewingsbestuursprogram 'n noodsaaklike deel van elke onderneming. As 'n eienaar weet wat sy munisipaliteit se lesings beteken en hoe dit gedoen is, kan hy weet of hy te veel omgewingsgelde betaal.

Volgens hom moet die bedryf self verantwoordelikheid aanvaar en probeer om begrip onder alle belanghebbendes te kweek terwyl hy sy sake in orde kry. 'n Eenvormige omgewingstandaard vir die bedryf is noodsaaklik en lede moet inligting en oplossings onder mekaar versprei.

Dr. Wynton Rabolao, direkteur van veeartsenydienste in Gauteng, het beaam wat Fourie gesê het.

Hy het gesê weens klagtes van die publiek en kommer oor mense se gesondheid neem politieke druk op die provinsiale departement van landbou, bewaring, omgewings- en grondsake toe om op te tree teen besoedeling deur abattoirs. Die kwessie skuif ál hoër op die prioriteitslys en die departement het nou met 'n ondersoek daaroor begin.

Rabolao het gesê die Regering sal graag met die bedryf wil saamwerk om 'n oplossing te vind.