Afgri-samesmelting kry groen lig

‘n Grootskaalse samesmelting tussen Afgri Operation Limited en Pride Milling (Pty) Ltd is deur die Mededingingstribunaal goedgekeur.

Luidens ‘n verklaring het die Mededingingskommissie die samesmelting goedgekeur, waarná dit na die tribunaal verwys is.

Die kommissie het bevind dat die samesmelting nie tot verminderde mededinging in die onderskeie verteenwoordigde bedrywe sou lei nie. Dit het aanbeveel dat die samesmelting sonder voorwaardes goedgekeur moet word.

Die maatskappye
Pride Milling se sake fokus op drie spesifieke afdelings van die landbou. Dit sluit in die maal van geel mielies, wit mielies en diverse operasionele vervaardiging van verpakte grane, bone en ander pulpverwante produkte.

Afgri doen op sy beurt sake deur sy drie sake-afdelings, genaamd Afgri Agri Dienste, Afgri Finansiële Dienste en Afrgi se voedselafdeling. Die finansiële dienste-afdeling bied aan boere, verwerkers en verbruikers verskeie finansiële opsies, terwyl die voedselafdeling pluimvee produseer, en plantolies en soja-gebaseerde produkte verskaf.

Dié samesmelting bied aan Afgri die geleentheid om die meulenaarsbedryf vir geel mielies te betree.

10 November 2011