Afgri verbeter sy wins

Die genoteerde landboumaatskappy Afgri se voorbelaste wins vir die 12 maande geëindig op 30 Junie was R553 miljoen.

Dit is 47% hoër as in die vorige 16 maande (R416 miljoen). Dít ten spyte daarvan dat “onderpresterende bates” teen ’n verlies van R93 miljoen afgeskryf is.

Mnr. Chris Venter, Afgri se uitvoerende hoof, meen die gunstige resultate is danksy die sterk prestasies van sy tradisionele landboudienste. “Hoe sterker ons is, hoe beter vir boere. Hulle het ’n sterk landboumaatskappy nodig.”

Afgri het in die vorige boekjaar sy jaareinde vanaf 28 Februarie tot 30 Junie verskuif. Gevolglik strek die vorige geouditeerde syfer oor 16 maande.

Vanjaar se resultate strek weeroor 12 maande. Die groep se netto wins het met 18% tot R354 miljoen (R299 miljoen verlede jaar) gestyg, terwyl sy kontantvloei met 128% tot R481 miljoen (R211 miljoen verlede jaar) verbeter het.

Die maatskappy se omset het vanaf R9,958 miljard (in 16 maande) tot R8,780 miljard (in 12 maande) gedaal. Die koste van verkope het egter ook van R7,601 miljard tot R6,328 miljard gedaal.

Die wins uit sy voortgesette bedrywighede het tot R447 miljoen gestyg. In die vorige jaar was dit R384 miljoen. ’n Dividend van 36,4 sent is verklaar.

15 September 2009