Afrika: 'Groen revolusie' het begin

Uitgeputte grond en ongetemde waterbronne belemmer die toename in landbouproduksie in Afrika suid van die Sahara.

China, met sy ongekende groei in landbouproduksie, het nie dié probleme nie, sê prof. Pedro Sanchez van die Aarde-instituut aan die Universiteit van Colombia in Amerika.

Volgens prof. Leopoldt van Huyssteen van die fakulteit agriwetenskappe aan die Universiteit Stellenbosch, gaan tot soveel as 60% van Afrika se geproduseerde voedsel verlore. Dit vrot op die lande of word verkeerd opgeberg.

Sanchez en Van Huyssteen het op die Chemrawn (Chemical Research Applied to World Needs) kongres op Stellenbosch gepraat oor hoe chemie in volhoubare landbou in Afrika ingespan kan word.

Daar word egter gemeen Afrika se "groen revolusie" het reeds begin.

Sanchez sê baie meer moet in die landbou belê word as 'n wyse om armoede in Afrika te verlig. Voedselbystand kos sowat $670 per ton. Daarenteen, as voedsel self deur begunstigdes verbou word, kos dit $240 per ton. "Ons moet in die voorste deel van die voedselketting begin belê nie aan die einde waar voedselbystand plaasvind nie," het hy gesê.

Belegging raak al hoe meer moontlik omdat Afrika-regerings besig is om te verbeter. Dié vasteland wys groot groei in die bydrae wat die landbou tot sy ekonomieë maak.

Landbouweekblad, 21 Desember 2007