Afrika-perdesiekte maai in Oos-Kaap

Die gevreesde Afrika-perdesiekte is besig om sy tol in die Oos-Kaap te eis en minstens 20 perde, waaronder rasegte Arabierperde, het reeds in dié provinsie omgekom. Berigte van perde wat dood is, is van Kirkwood, Alexandria, Uitenhage, Bathurst, Hogsback en Stutterheim ontvang.

Dr. Jane Pistorius, adjunk-direkteur veeartsenydienste vir die westelike streek van die Oos-Kaap, het gesê sy is bekommerd oor die uitbreking van dié dodelike siekte, maar haar hande is afgekap. "Om die besmette diere in kwarantyn te plaas dien geen doel nie, omdat die virus deur muggies oorgedra word." Dié muggies teel vinnig aan in warm, klam plekke. Die goeie reën wat onlangs in die provinsie geval het, het die broei-toestande bevorder.
Dr. Truuske Gerdes, 'n viroloog by die Landbounavorsingsraad se Onderstepoort Veeartsenykunde-instituut (LNR-OVI) in Pretoria, het gesê dit is hoofsaaklik perde wat nie teen die siekte ingeënt is nie, wat gevrek het.
Veeartse van die LNR-OVI het die soort perdesiekte geïdentifiseer wat deur die muggies oorgedra word. 'n Entstof is beskikbaar wat drie keer na mekaar toegedien moet word om perde immuun teen die siekte te maak. Dit moet egter gesonde perde wees, aangesien die entstof nie sal werk as die perde reeds siek is nie, want dit neem drie weke om immuniteit op te bou, het sy gesê.
Dr. Pistorius sê al wat eienaars kan doen, benewens inent, is om diere met die voorgeskrewe middels te dip en die muggies te probeer weghou. "Dit is egter van die grootste belang om die twee soorte entstowwe nie te vermeng nie, maar volgens voorskrif drie weke uitmekaar toe te dien."
Sy sê hoewel koue weer die uitbroei van muggies aan bande lê, dié siekte tot in Junie nog kan voorkom.
Sy het gewaarsku dat alle karkasse verbrand moet word en gesê die vleis van diere wat dood is, moet glad nie deur mense geëet word nie. Dit is uiters giftig.
In KwaZulu-Natal het sowat 300 perde in die distrikte Suid-Drakensberg en Griekwaland-Oos die afgelope tyd weens Afrika-perdesiekte gevrek.18 April 2003