Afrivet neem Eco oor

Die Suid-Afrikaanse swart bemagtigingsgroep Afrivet Business Management het die Britse landboumaatskappy Eco-Dieregesondheid, wat in Pretoria gebaseer is, vir R23,4 miljoen gekoop.

Afrivet is 'n bestuursonderneming wat onder leiding van dr. Peter Oberem reeds die afgelope vier jaar lank Eco bestuur en die belange van verskeie buitelandse dieregesondheidsmaatskappye in Suid-Afrika behartig het.

Volgens Oberem het Eco se omset binne drie jaar van R8 miljoen tot R80 miljoen gegroei en Afrivet het nou 'n aandeel van 10 % in die plaaslike dieregesondheidsmark van R800 miljoen per jaar. Dit plaas hulle onder die vyf grootste maatskappy in hierdie mark.

"Ons het ook die voortou geneem met swart bemagtiging met aandeelhouding deur Fish River Veterinary Supplies van Oos-Londen. Afrivet se oogmerk is om oral in Suid-Afrika dienste te verskaf. Ons is reeds bedrywig in Namibië, Botswana en Zimbabwe (deur Ecomed, wat 'n belang in Afrivet het), terwyl Tanzanië en Kenia volgende aan die beurt is," sê hy.

Mnr. Peter Lawrens, voorsitter van Lawrens plc, wat Eco tien jaar gelede gestig het, sê dit is 'n voordelige transaksie vir albei partye en hulle sal samewerking tot wedersydse voordeel behou.