Agri SA beklemtoon belangrikheid van sensus

Agri SA het sy lede wat nog nie vraelyste vir die landbousensus ingevul het nie, aangemoedig om dit wel te doen.

'n Afvaardiging van Statistiek Suid-Afrika het onlangs met mnr. Japie Grobler, voorsitter van Agri SA, vergader om die vordering met die landbousensus te bespreek. Statistiek SA het daarop gewys dat hy sowat 50 % van die vraelyste ontvang het. Daar is beklemtoon dat die uitstaande inligting belangrik is om betroubare resultate te verseker.

Agri SA het gesê hy besef die belangrikheid van goeie inligting, veral op streeksvlak, aangesien die uitwerking van 'n verskeidenheid beleidsaksies, soos grondbelasting op die landbou, nie sonder hierdie inligting ge-evalueer kan word nie.

Mnr. Grobler sê hulle ontvang steeds navrae van boere wat skepties is oor die vertroulikheid van inligting. "Agri SA het 'n staande uitnodiging om dié proses te moniteer en het homself vergewis dat die stelsel vertroulikheid waarborg."