Agri SA bly oor SAPD-eenhede

Die instelling van eenhede om misdaad in landelike gebiede te bekamp word verwelkom aangesien dié gemeenskappe kwesbaar is, sê Agri SA.

Mnr. Nathi Mthethwa, die Minister van Polisie, het tydens die bekendstelling van die 2009/’10 boekjaar se misdaadstatistiek aangekondig dat dié eenhede weer ingestel gaan word.

In ‘n verklaring sê mnr. André Botha, voorsitter van Agri SA se veiligheidskomitee: “Om aanvalle en misdadigheid op die boerderygemeenskap aan bande te lê, is doeltreffende wetstoepassing van onmiddellike belang. Ons aanvaar die landelike beveiligingstrategie, ondersteun deur die beleid vir sektorpolisiëring en reserviste, as voldoende om landelike misdaad te bekamp.”

Botha sê die feit dat veediefstal die afgelope geldjaar met 6,5% toegeneem het, is ‘n teken dat dit ‘n ernstige misdryf in die landbousektor is. Hy sê dié misdaad het ‘n nadelige uitwerking op die winsgewendheid van kommersiële boere, maar meer so op kleinskaalse boere.

Inisiatiewe verwelkom
Hy sê Agri SA verwelkom die inisiatiewe wat die SAPS, volgens Mthethwa, reeds in dié verband onderneem het.

Botha sê hoewel die statistiek ‘n belowende prentjie vir misdaadbekamping in die land skep, kan meer gedoen word: “Agri SA wens Mthethwa en toegewyde lede van die SA Polisiediens geluk met die resultate wat behaal is. Tog is persentasie-sukses met arrestasies van verdagtes steeds te laag wat ‘n boodskap uitstuur dat die kanse op arrestasie vir oortredings skraal is”.

Volgens Botha versoek Agri SA dat die reservistebeleid en landelike beveiligingstrategie so spoedig moontlik gefinaliseer en ingestel moet word.

“Dit sal die landbougemeenskap die geleentheid bied om as reserviste by misdaadbekampingsoperasies betrokke te raak. Agri SA wil graag met die minister in gesprek tree oor die praktiese implikasies van die aankondiging en die finalisering van die strategie en beleid,” sê Botha.

11 September 2010