Agri SA kap Mthetwa oor plaasgeweld

“Dis wonderlik dat politici deel van die stryd teen misdaad wil wees en vra dat alle rolspelers hulle deel moet doen, maar dit moet hulle doen op grond van feite”.

Dit is die reaksie van mnr. Johannes Möller, voorsitter van Agr iSA, nadat die Minister van Polisie vanoggend ‘n spreker op die misdaadkonferensie in Centurion was.

Möller sê hy ervaar die afgelope jaar ‘n groter openheid vanaf die Regering ten opsigte van die oplos van probleme wat spesifiek die landbou raak. “Dit is verblydend dat die Minister van Polisie, mnr. Nathi Mthethwa, ons samewerking en hulp gevra het. Ons ontvang meer en meer sulke versoeke van die Regering. Ons het dit ook spesifiek van die mnr. Gugile Nkwinti, die Minister van Landelike Ontwikkeling en Grondhervorming, ervaar.

Möller sê dit was ongelukig dat Mthethwa, ten spyte van feite om die teendeel te bewys, opgemerk het dat die gebrekkige kommunikasie tussen boere en plaaswerkers asook die indiensname van buitelanders – spesifiek dié sonder dokumentasie – van die groot redes vir plaasaanvalle en –moorde is. “Dit is nie die feite wat ons het nie en dit spel nie samewerking nie!”

Hy het homself ook uitgespreek oor die feit dat die minister gesê het dat hy hom nie oor plaasaanvalle uitspreek nie, aangesien dit ‘n netelige saak is. “Dis nonsens! Politici spreek hulself nie uit wanneer boere aangeval word nie, maar daar is altyd reaksie as iemand op ‘n plaas doodgeskiet of agter ‘n voertuig aangesleep word! Boere is ook burgers van dié land, en verdien dieselfde behandeling as enige ander burger wat aangeval word!” 

Möller het ook gereageer oor ‘n stelling van Mthethwa dat Agri SA hom nie gereeld uitspreek wanneer plaaswerkers of -bewoneers aangeval word nie. “Ons reageer net op dit wat met ons lede gebeur, ons moet aan dié mense wat ons lede is ‘n diens lewer.”

8 Maart 2010