Agri SA prys Land Bank
Mnr. Johannes Möller, voorsitter van Agri SA. Foto: JOHAN NORVAL
Die direksie en die bestuur van die Land Bank het ‘n besondere prestasie behaal om ná ‘n tydperk van volgehoue verliese ‘n wins, soos weerspieël in die jongste finansiële state, te kon aanteken, sê mnr. Johannes Möller, (foto hiernaas) voorsitter van Agri SA.
Hoewel die Land Bank ‘n afnemende aandeel in kredietverskaffing aan die kommersiële landbou ervaar, is bykans R5 miljard, of 12% van landbouskuld, steeds by die Bank gesetel, volgens Möller.
Möller sê dit gaan egter nie slegs oor finansiering as sodanig nie, maar ook oor die belangrike rol wat dié instelling speel en behoort te speel om mededinging ten opsigte van die verskaffing van finansiering aan die landbou te verseker.
“Ons is egter bewus van die wankelrige aard van die bate- en kapitaalstruktuur van die bank, bewerings van bedrog wat nog nie bygelê is nie en onduidelikheid oor die interaksie met die staat om veral ook nuwe toetreders tot die landbou - wat uitwinning in die gesig staar - te ondersteun”.
Die groter klem wat tans op landelike ontwikkeling - veral in die voormalige tuislande - geplaas word, dui verder op die noodsaak vir ‘n meer doelspesifieke struktuur naas die Land Bank, volgens Möller.
Hy het ook verwys na pres. Jacob Zuma se uitlating naamlik dat die gewillige-koper-gewillige-verkoper-benadering ten opsigte van grondtransaksies drasties hersien moet word aangesien dit grondhervorming strem.
“Indien dit die president se bedoeling is om meer pragmatiese modelle vir grondhervorming te ontwikkel, sal ons graag wil saamwerk. Indien dit egter neerkom op prysmanipulasie en verskanste nasionalisering, het ons verseker ‘n besliste probleem met dié benadering” het Möller gesê.
Möller het aangedui dat Zuma verseker genader sal word om groter duidelikheid oor dié saak te verskaf.
18 Augustus 2009
- 1879 keer gelees
Geborgde skakels
Daaglikse nuusbrief
Weeklikse nuusbrief
Teken In
E-pos forum
Gewildste stories
Alle regte voorbehou. © Landbou.com 2011. In Suid-Afrika gepubliseer deur Media24
Web Development by FormFunction
Kommentaar
Lewer kommentaar. (Jy hoef nie ingeteken te wees nie.)