Agri SA vra gebede vir die land

Met die probleme wat die land en ook die landbousektor tans ervaar vra Agri SA verootmoediging en gebede.

Luidens ‘n verklaring sê mnr. Johannes Möller, voorsitter, probleme en knelpunte raak nie net die landbousektor nie. Hy sê wanneer die natuur en spesifiek dierelewens deur droogtetoestande verswelg word– soos wat tans die geval in verskeie gebiede is, “raak dit die hart van alle mense aan”.

Volgens Möller gaan die sektor tans onder klimaatuiterstes van ‘n ongekende aard gebuk. Dit het ‘n uitwerking op boere se vermoë om normaal te kan produseer en dit kan die land se voedselsekerheid ernstig ondermyn.

Möller sê dit is ook hartseer dat die aanloop tot die feestyd gekenmerk word deur misdaad wat in baie gevalle uiters gewelddadig is.

Gebede
Luidens die verklaring vra Möller derhalwe die volgende van alle Suid-Afrikaners:

“Ek doen graag ‘n vriendelike dog dringende beroep op mense van alle geloofsgroepe om in die komende week vanaf 16 Desember elke dag om 12:00 hulle in gebed te verootmoedig om vir versoening en vrede in die land te bid en om ook veral die groot behoefte aan reën in verskeie gebiede in hulle gebede op te dra.”

14 Desember 2010