Akademie vir nuwe boere

Altesame 27 opkomende boere gaan eersdaags opleiding in die landbou en verwante studierigtings by die landbou-onderneming Kaap Agri se akademie op Porterville ontvang.

Volgens mnr. George Eksteen, voorsitter van Kaap Agri, is die eerste kursus 'n ontwikkelingsplan wat 'n jaar duur en deur ITO Focus Bathopele aangebied word. Daar sal ook verskeie kortkursusse vir plaaswerkers ontwikkel word en mettertyd sal hulle ook leerlingskappe bekend stel.

Kaap Agri bedien sowat 470 opkomende boere. Uit dié boere het die maatskappy 'n paar
geïdentifiseer wat na sy mening potensiaal toon. Hulle is aan 'n strawwe takseringsproses (taalvaardigheid en leerpotensiaal is in ag geneem) onderwerp voor hulle vir die kursus gekeur is.

"Die grootste behoefte onder opkomende boere is die oordrag van kennis deur middel van opleiding. Daar is ook 'n behoefte onder plaaswerkers. Goeie opleiding gee selfvertroue en 'n grondslag aan die leerder sodat hy met entoesiasme en kreatiwiteit kan voortbou in die landbou," het Eksteen gesê.

Lees meer in Landbouweekblad se uitgawe van 24 April 2009.

23 April 2009