Alle vee in Suider-Afrika getel

Die eerste opname van plaasdiere in Suid-Afrika en ál die lande van die Suider-Afrikaanse Ontwikkelingsgemeenskap word tans in die streek onderneem. Die projek word deur die Verenigde Nasies betaal en is 'n uitvloeisel van kommer oor 'n wêreldwye voedselkrisis, sê dr. Michiel Scholtz, direkteur: LNR-Irene Diereverbeteringsinstituut (LNR-DVI).

Die doel van die opname is om vas te stel hoeveel vee daar in elke land is en 'n land se vermoë te bepaal om goeie proteïen aan sy mense te voorsien. Die klem lê dus op volhoubare produksie.

Dit gaan ook nie net om getalle nie, maar selfs watter veerasse in die onderskeie lande teenwoordig is. Alle boere, van groot kommersiële boere tot opkomende boere in afgeleë landelike gebiede, sal betrek word. Die opname dek alle vlakke van veeboerdery, sê dr. Scholtz.

Hy sê die opname sal veral vir Suid-Afrika belangrik wees omdat dit ook die invloed van ingevoerde rasse op inheemse rasse behoort aan te dui. Aangesien die tradisionele metodes van veeboerdery ook die eerste keer by die opname betrek word, sal bykomende inligting ingewin word oor die maatskaplik-ekonomiese omstandighede van die eienaars, hoe die diere aangehou word en in watter toestande. Dit is inligting wat nuttig vir die beleidmakers kan wees.

In Suid-Afrika onderneem personeel van die Landbounavorsingsraad en die provinsiale departemente van landbou die opname.