Arabiere kan weer SA vleis eet

Die Verenigde Arabiese Emirate (VAE) het op 21 Mei hul verbod op die invoer van Suid-Afrikaanse rooivleis opgehef. Die rede vir dié land se verbod blyk nou nie bek-en-klou-seer te wees nie, maar Slenkdalkoors.

Saoedi-Arabië was die eerste Midde-Oosterse land wat weens die uitbreking van bek-en-klou-seer in Suid-Afrika die invoer van plaaslike rooivleis verbied het. Synde die leierland in die Golfgebied, het die buurlande gou sy voorbeeld gevolg. Daarom is dit interessant dat die VAE ten opsigte van die opheffing van die verbod die voortou neem, sê dr. Gerrit Bruwer, bestuurder: voedselstandaarde en uitvoerontwikkeling by die die SA Vleisbedryfsmaatskappy (Samic). Benewens Saoedi-Arabië, geld die verbod nog in Koeweit en Egipte.

Hy sê 'n ander interessante aspek is dat die VAE-verbod nie noodwendig weens bek-en-klou-seer was nie, maar weens Slenkdalkoors — 'n bekende Afrika-siekte wat vir die mens gevaar inhou. Die verbod is opgehef nadat vasgestel is dat Slenkdalkoors nie in Suid-Afrika uitgebreek het nie.

Dit plaas opnuut die klem op die belangrikheid van 'n unieke handelsmerk vir vleis waarop 'n eie identiteit vir die Suid-Afrikaanse produk in die wêreldmark gebou kan word. Terselfdertyd is dit 'n aanduiding dat ten opsigte van wêreldhandel, voorligting oor Suid-Afrika se potensiaal ver kortskiet, sê dr. Bruwer.

Uitvoerders van rooivleis na die Midde-Oosterse markte verwag die ander lande in dié gebied sal binne afsienbare tyd die VAE se voorbeeld volg. Dit is egter onwaarskynlik dat uitvoerders hierdie mark nou effektief kan benut. Struikelblokke is:

• Brasilië en China gebruik dié mark as 'n stortterrein en land hul vleis teen R26/kg.

• Die verstewiging van die randwisselkoers.

• Baie verbruikers soek dié tyd van die jaar koeler vakansieoorde elders in die wêreld op. Die vraag is dus nie na wens nie.

   

31 Mei 2002