ASA wurg met vrywillige bydraes

Aartappels Suid-Afrika (ASA) ondervind groot probleme met kontantvloei omdat die aansoek vir die implementering van statutêre heffings sloer. Boere moet intussen aanhou om hul vrywillige bydraes aan die organisasie te betaal, het mnr. Arthur Melck, voorsitter van die Sandveldse Aartappelkwekers-organisasie op die jaarvergadering gesê.

Hy het gesê ASA doen sy bes om die aangeleentheid so vinnig moontlik af te handel. Die adjunkminister van landbou het onder meer versoek dat die 'Potato Industry Development Trust'-akte gefinaliseer word,'n ekonomiese impakstudie van die aartappelbedryf op die landbou uitgevoer word, die ou Aartappeltrust forensies ondersoek word en die herstruktuering van ASA oorweeg word.

Mnr. Melck het gesê die afgelope dekade word staatsbydraes vir aartappelnavorsing drasties deur die Regering gesny en bedrywe moet al hoe meer self geld vind daarvoor. Die LNR is tot nou toe as die hoofvennoot vir aartappelnavorsing beskou, maar hy ondervind nou 'n kommerwekkende toename in bedankings van ervare kundiges.

Die Sandveld het egter 'n kundige navorsingskomitee, 'n werkgroep en die Sand-proefperseel waar eie inisiatiewe geneem word om in navorsingsbehoeftes te voorsien. Verskeie proewe en projekte is reeds aan die gang, het mnr. Melck gesê.