Besetters moet weg van Walmansthal

Die plakkers wat verlede maand die grond van die Walmansthal-vereniging vir Kommunale Eiendom (WCPA) naby Pretoria beset het, is deur die hof beveel om te trek.

Luidens ’n verklaring sê AfriForum, wat die gemeenskap met sy hofsaak bygestaan het, die Noord-Gautengse Hooggeregshof het die gemeenskap Donderdag (2 Februarie 2012) beveel om die grond te ontruim.

Die grond lê tussen Ludwig’s Roses en die militêre basis Walmansthal.

Luidens ’n berig in Beeld het duisende plakkers glo twee naweke gelede hul intrek op dié grond geneem voordat die WCPA hulle daar kon tuismaak. Die grond is in 2007 deur me. Lulu Xingwana, voormalige Minister van Landbou en Grondsake, aan die gemeenskap oorhandig.

Polisiekaptein
Volgens die koerant het ’n voormalige polisiekaptein verlede jaar glo staatsgrond by Haakdoringlaagte, aan die ander kant van Ludwig’s Roses, begin verkoop. Hy het glo te min grond gehad vir al die mense van wie hy geld gevat het, en het die mense toe glo op Walmansthal laat intrek.

AfriForum het glo ná die onlangse besetting tussenbeide getree nadat van die verteenwoordigers onder leiding van “die berugte kapt. Makene” – die voormalige bevelvoerder van Hammanskraal-polisiestasie – betoog het dat hulle die wettige eienaars van die grond is.

Die hof het bevind dat slegs die WCPA die wettige eienaars van die grond is, en dat die besetters hul onwettige strukture binne 15 dae moet verwyder. Die besetters moet ook die regskoste van die saak dra.

Bron: Beeld

2 Februarie 2012