‘Beskerm landbougrond teen myne’

Alle grondeienaars het ’n plig en roeping om “hul eiendom teen die aanstormende “mynbou-vernietigers” te beskerm.

Grondeienaars moenie wag tot dit te laat is nie, maar dadelik distrikslandbouverenigings in kennis stel van enige aansoeke van myne om prospekteer- of mynregte sodat die proses sinvol hanteer kan word, sê dr. Wilhelm Schack, voorsitter van die Limpopo-omgewingsbewaringskomitee.

Schack het ’n beroep op grondeienaars gedoen om plaaslike koerante weekliks te fynkam vir enige kennisgewings daaroor. Hy raai boere ook aan om onmiddellik met hul landbouvereniging kontak te maak indien hulle van so ’n aansoek uitvind.

Mnr. Jan Viljoen, voorsitter van die TLU SA Noord, sê onvervangbare landbougrond is dikwels in die visier van prospekteerders. Volgens hom word mynbou as ’n geleentheid gesien om vinnig ryk te word.

Dit hou vernietigende gevolge vir die toekomstige geslagte in, meen hy. Luidens mediaberigte is daar sedert die promulgering van die Wet op Minerale-, Petroleum- en Hulpbronontwikkeling sowat 24 000 aansoeke vir prospekteer- en mynregte ingedien.

Die meeste daarvan was in Limpopo, gevolg deur Mpumalanga, Noordwes en die Noord-Kaap. In die Wes-Kaap is 1 096 aansoeke toegestaan.

Lees meer in Landbouweekblad se uitgawe van 9 April 2010.

8 April 2010