'n Voedselkrisis is Suid-Afrika se voorland indien maatreëls nie ingestel word om sy produsente te beskerm en selfversorgendheid in die hand te werk nie, sê Mnr. Bertus de Jongh, die uitvoerende hoof van die Melkprodusente-organisasie van Suid-Afrika (MPOSA), die moederliggaam van die Melkprodusente-organisasie (MPO).
De Jongh het op die MPO se roetevergaderings deur die Vrystaat gesê die krisis geld nie net Suid-Afrika nie. Hy sê wanneer die wêreld-ekonomie weer verbeter is die verwagting dat die voedseltekort wat voor die ekonomiese insinking geheers het, homself sal herhaal.
Indien wetgewing nie oorweeg word om die druk van produsente te verlig en ander oorheersende rolspelers te beperk nie, sal 'n tekort aan voedsel voorkom. Voedsel sal dus ten duurste ingevoer moet word, aangesien min produserende lande kos so goedkoop soos Suid-Afrika kan verbou.
"Die blote feit dat ingevoerde produkte soos suiwel tans goedkoper beskikbaar is as plaaslike produkte beteken nie dat dit permanent beskikbaar sal wees nie," sê hy. Gesubsidieerde suiwelprodukte uit die Europese Unie en Amerika begin nou na Suid-Afrika stroom teen laer pryse laer as wat dit plaaslik geproduseer kan word.
2 Junie 2009
