Besoedelde water stoot op na reën

Suur mynwater loop die Tweelopispruit in. Foto: ALANI JANEKE

Boere in die noordelike dele van die land moet bedag wees op die uitwerking wat  besoedelde water op hulle gewasse kan hê na die swaar reëns en oorstromings wat die afgelope weke voorgekom het, sê die Nasionale Waterforum (NWF).

Luidens ‘n verklaring is die NWF bekommerd oor die situasie.

Mnr. Louis Meintjes, voorsitter van die NWF, sê die oorstromings het vuil en besoedelde water, wat verdunde sure en rioolwater bevat, oor ‘n wyer gebied versprei.

“Veral boere moet bedag daarop wees dat oorstroomde lande dalk spesiale aandag nodig het as die water eers gesak het. Die gevaar lê in die uitbreking van swamme en siektes waar daardie besoedelde water op boere se lande gekom het en boere moet fyn daarna oplet,” maan Meintjes.

Risiko’s rondom besproeiing
Intussen sê me. Mariëtte Liefferink, uitvoerende hoof van die Federasie vir ‘n Volhoubare Omgewing, onbehandelde suur mynwater loop vanuit die westelike mynkom in die Tweelopiespruit en die daaropvolgende vertakkings en riviere in, wat op die ouend deur besproeiingsboere op hul gewasse gebruik word.

“Ek was vanoggend (20 Januarie) daar en tans vloei daar sowat 40 miljoen liter onbehandelde suur mynwater, en 12 miljoen liter gedeeltelik behandelde water per dag in die spruit in. Dié water vloei af na die Tarlton-omgewing en word op die ouend deur meer as 11 900 besproeiingsboere gebruik,” vertel Liefferink.

Toetse
Liefferink sê vroeër is toetse op gewasse, spesifiek pruie en kool, langs een van die riviere gedoen en verhoogde uraanvlakke is daarin geïdentifiseer.

Sy raai boere aan om hulle gewasse te laat toets, en om as ‘n groep saam te staan om druk op die Regering uit te oefen om die situasie aan te spreek. “Die situasie hou risiko’s vir hulle lewensvatbaarheid en die land se produksiepotensiaal in.”

21 Januarie 2011