BKB-gesprek laat veselbedryf gons

Die wol- en bokhaarbedryf gons oor samesprekinge wat BKB-direksielede met SA Mohair Brokers Ltd. gevoer het oor die voorgestelde oorname van CMW deur OVK.

Verskeie bedryfsleiers in die wol- en bokhaarbedryf het hulle verontwaardiging uitgespreek nadat dit rugbaar geword het dat lede van die direksie van BKB met direkteure van SA Mohair Brokers Ltd. (SAMB) samesprekings gevoer het oor die voorgestelde oorname van CMW deur OVK.

Landbouweekblad het verskeie oproepe van ontstelde leierboere hieroor ontvang. Boere sê indien dié poging van BKB die beplande oorname van OVK van CMW sou kelder, dit mededinging in die bedryf kan knou.

Mnr. Arthur Short, die voorsitter van SAMB en CMW, het bevestig dat samesprekings op versoek van die voorsitter van BKB, met lede van die direksie van SAMB plaasgevind het. Mnr. Manie Botha, OVK se direkteur op SAMB, was egter nie op die samesprekings teenwoordig nie.

Hoewel Short hom nie wou uitlaat oor die besonderhede van die gesprek nie, het hy benadruk dat dit hoofsaaklik gehandel het oor hantering van die sybokhaarskeersel onder een dak. “Dit was bloot ‘n informele gesprek. In dié stadium het niks daaruit gevloei nie. Dit beteken egter nie dat daar in die toekoms nie weer oor die hantering van sybokhaar gesels sal word nie.”

Short het gesê die aanbod van OVK om die meerderheidsaandeel (66%) in CMW te bekom, sal binne twee weke bekend wees en op ‘n reeks vergaderings aan aandeelhouers verduidelik word.

3 November 2009