Boer in bed doodgeskiet

‘n 70-jarige boer van die Hoedspruit-omgewing is deur sy kamervenster in sy bed doodgeskiet gedurende 'n plaasaanval. Sup. Ronel Otto, woordvoerder vir die Suid-Afrikaanse Polisiediens (SAPD) in Limpopo, sê mnr. Kobus van Staden en Henriëtte, sy 66-jarige vrou, het gisteraand televisie gekyk toe ‘n verdagte hulle gordyn weggetrek en op hulle geskiet het.

Twee skote het Van Staden getref, en hy het vermoedelik aan ‘n skietwond in die nek beswyk. Otto sê Van Staden se vrou het op die aanvallers geskiet, waarna hulle op die vlug geslaan het. Volgens mnr. Braam van der Merwe, ‘n lid van Agri Hoedspruit, het die verdagtes die kamervenster met ‘n graaf stukkend geslaan om op die paartjie te skiet.

Vroeër by die huis ingebreek
Van der Merwe sê die verdagtes het glo vroeër die aand reeds deur die Van Stadens se kombuis die huis binnegedring. “Hulle het ‘n kombuisvenster gebreek en die huis binnegekom. Daar is egter ‘n veiligheidshek in die gang, so hulle kon nie by die slaapkamer uitkom nie. Hulle is toe vermoedelik die huis uit waarna hulle van buite na die slaapkamer geloop het.” 

Hy verduidelik dat die televisie se klank hard aan was en die egpaar dus nie gehoor het toe daar by die kombuis ingebreek is nie. Volgens Van der Merwe het boere wat nog patrollie gery het om vrugtediewe vas te trek vinnig op die toneel aangekom.

Niks is gesteel nie. “Die tannie se beursie het op ‘n kassie in die kombuis gelê, maar dis onaangeraak gelaat.”

Groot kommer oor aanvalle
Otto sê die Polisie is tans op soek na ‘n onbekende getal verdagtes. “Ons is nie seker of enige van hulle raakgeskiet is nie, maar daar is nog geen sulke leidrade op die toneel gevind nie.” Die Polisie se honde-eenheid en spoorsnyers fynkam die omgewing.

Intussen sê Van der Merwe daar heers ernstige kommer plaasaanvalle in Limpopo en die res van die land. Hy sê twee van hulle grootste probleme is die groot aantal onwettige immigrante wat van Mosambiek af inkom, asook die afskaffing van die kommandostelsel.

“Ons het ‘n baie goeie kommandostelsel in plek gehad, selfs ons plaaswerkers het veilig gevoel. ‘n Lewe is niks meer werd nie en dis vir dié ouens baie maklik.”

Lees ook:

Plaasmoord ruk die Vrystaat (6 Januarie 2010)

Twee vas oor plaasmoord (7 Januarie 2010)

Plaasaanval by Vaalharts (12 Januarie 2010)

Twee boere per week vermoor (13 Januarie 2010)

Plaasaanvalle duur steeds voort (15 Januarie 2010)

Nóg ‘n boer vermoor (25 Januarie 2010)

Dwelms speel rol by plaasaanvalle (26 Januarie 2010)

5 Februarie 2010