Boer in Egipte vermoor

'n Suid-Afrikaanse boer is in Egipte vermoor, te midde van 'n beplande ooreenkoms om saam te werk tussen Agri SA en dié land.

Dr. Theo de Jager, voorsitter van Agri SA se Afrika-komitee, sê Egipte is een van die 24 lande wat hulle al genader het vir ’n samewerkingsooreenkoms vir plaaslike boere om daarheen uit te brei.

“Die ooreenkoms is egter nog nie gereed nie, maar ek weet daar is ’n hele paar boere wat reeds die vriendelike uitnodiging soontoe aanvaar het en hulle doen oor die algemeen baie goed,” vertel De Jager.

Die meeste Suid-Afrikaanse boere is na die Aswandam-distrik uitgenooi waar hulle projekte onderneem om die omgewing minder woestynagtig te maak.

Lees hier meer oor Suid-Afrikaanse boere in ander lande.

Die voorval
Luidens ’n berig in Beeld is die 56-jarige mnr. André le Roux, ’n druiweboer van Klawer, Woensdagmiddag (8 Junie 2011) in Egipte met AK 47-aanvalsgewere doodgeskiet. Le Roux is glo op ’n stofpad naby Belbeis, sowat 50 km van die Egiptiese hoofstad, Kaïro, deur twee mans doodgeskiet.

Mnr. Wietz Botes, van Dole SA wat saam met Le Roux op ’n sakebesoek in die land was, het ’n vleiswond opgedoen.

Volgens mnr. Albie Laubscher, waarnemende hoofdirekteur van konsulêre dienste in Pretoria, is die Suid-Afrikaners vermoedelik vir Amerikaners aangesien.

Twee mans op motorfiets
Botes sê hulle was op pad van ’n pakhuis af toe twee mans op ’n motorfiets hulle voorgekeer het en nie wou padgee nie. Die bestuurder van die Suid-Afrikaners se voertuig het toe agteruit ry en die mans het op hulle begin skiet.

“Ek het gevoel iets tref my blad, maar wou uit vrees nie opkyk nie. Nog ’n koeël het oor my gevlieg en André in die bors getref,” vertel Botes.

Bron: Beeld

10 Junie 2011