Boer gevonnis oor kinderarbeid

In wat as 'n geskiedkundige saak beskou word, is 'n boer van die Suid-Kaap ná 'n hofsaak van drie jaar in die Mosselbaaise Landdroshof skuldig bevind dat hy kinderarbeid gebruik het.

Mnr. Dewald Barnard van die plaas Young's Hope tussen Mosselbaai en George is tot 'n boete van R12 000 en tronkstraf van drie jaar, wat vir vyf jaar opgeskort is, gevonnis.

Volgens mnr. David Esau van die Departement van Arbeid in die Wes-Kaap is dit die eerste saak in die land waarin 'n werkgewer onskuldig gepleit het op 'n strafregtelike klag van kinderarbeid. Mnr. Barnard het aangevoer dat hy nie die vier kinders gedwing het om te werk of 'n skriftelike kontrak met hulle gehad het nie.

Hy het die kinders R35 per dag betaal om onder meer volstruise te voer en in die groentetuin te werk.

Die senior staatsaanklaer, mnr. Peter Dempsey, sê dit was duidelik dat daar 'n goeie verhouding tussen mnr. Barnard en die kinders bestaan het en dat hy hulle nie sleg behandel het nie. Die plaaswerkers se kinders en sy eie kinders het saamgespeel en soortgelyke take op die plaas gedoen in ruil vir onderskeidelik betaling en sakgeld.

Volgens hom verteenwoordig die feit dat die werkers se kinders geweet het hulle gaan betaal word vir die soort werk wat hulle doen egter 'n ooreenkoms, wat 'n oortreding van die wet is.