Boer skiet vermeende kabeldiewe

Twee vermeende koperkabeldiewe, wat glo ’n boer van Marble Hall in Limpopo met ’n slagtersmes wou aanval, is geskiet.

Luidens ’n berig in Beeld (22 Februarie 2012) is die twee mans met ’n haelgeweer geskiet, waarna hulle in ’n plaasdam geval het. Albei mans is dood.

Die 40-jarige mnr. Lucas Terblance van die plaas Toitskraal sê: “Hulle wou my aanval. Toe skiet ek hulle. Daar word elke dag ’n boer doodgemaak.”

Diefstal
Terblanche boer met tabak, groente en suurlemoene. Hy sê hy het al derduisende rande se skade weens koperkabeldiefstal gely. Hy is omstreeks 02:00 deur veiligheidswagte op sy plaas in kennis gestel dat die twee mans besig was om kabels by ’n waterpompstasie naby ’n dam uit te grawe.

Terblanche is met sy haelgeweer na die dam toe. Die mans het glo met ’n mes op hom afgestorm toe hulle hom sien. “Hulle was sowat 5 m van my af. Ek het albei in die nek geskiet.” Die gewonde mans het glo geval en van die damwal af in die water gerol.

Lt.kol. Mohale Ramatseba, polisiewoordvoerder in Limpopo, sê twee moordsake is geopen. Nadoodse ondersoeke sal vasstel of die mans weens die skietwonde dood is of verdrink het. Die Direkteur van Openbare Vervolging sal bepaal of Terblanche vervolg gaan word.

Bron: Beeld

22 Februarie 2012