Boere en verbruikers se stem gehoor

Indringende vrae oor die geweldige gaping tussen die pryse wat boere vir hul produkte kry en dit wat verbruikers daarvoor betaal, is gevra op die kongres van Noordwes se Rooivleisprodusente-organisasie (RPO) op Lichtenburg.

Teleurstelling is uit verskeie oorde uitgespreek dat die komitee wat kospryse moniteer nie die kongres bygewoon het nie.

Die kongres het die verbruiker as 'n vennoot in die rooivleiswaardeketting bespreek. Aandag is ook gegee aan die waarde van saamstaan om boere en verbruikers se stem harder te laat hoor oor sake wat hulle raak. Die kongres meen meer geleenthede moet geskep word waar die verbruiker en die boer om een tafel bymekaar kom en probleme bespreek.

Boere wou weet waarom dalende produsentepryse nie aan verbruikers deurgegee word nie. Van verbruikerskant was daar vrae oor die geweldige hoë pryse wat op grondvlak vir basiese kosprodukte, soos vleis, betaal word.

Me. Ina Wilken van die Nasionale Verbruikersunie het gesê dit blyk uit 'n ondersoek dat boere in Desember verlede jaar sowat R18/kg vir A-graad karkasse ontvang het, terwyl verbruikers in kettingwinkels vir sekere snitte tussen R76/kg en R94/kg moes opdok. "Ek hoop die komitee wat pryse moniteer is wawyd wakker en kyk na waar die werklike probleme lê."

Boere het daarop gewys dat hulle prysgewys beboet word ten opsigte van klassifikasie van karkasse , maar dat verbruikers nie ingelig word oor die gradering wat hulle koop nie en dat hulle bloot op sig- en pryswaarde hul keuse maak.

Mnr. Giel Theron, voorsitter van die Noordwes RPO-tak, sê daar kan heelwat vrae gevra word oor die waarde en nut van 28 verskillende klasse van vleis as die verbruiker oor die toonbank net een klas, nl. vleis, koop. Hy weet nie van mense wat aandring op A2-maalvleis nie.

Me. Wilken meen die rooivleisbedryf skenk nie genoeg aandag aan die bemarking van hul produk nie en benut nie die reklamewaarde van feite, soos dat rooivleis 'n uitstekende bron van vitamien B12, is nie.