Boere sal kennis deel

Sowat 93 % van kommersiële boere sal bereid wees om hul kennis en ervaring met ontwikkelende swart boere te deel.

Dít blyk uit 'n telefoniese opname wat die maatskappy Research in Action in die grootste deel van die land onder 400 kommersiële boere gedoen het. Volgens dié opname het 60,5 % van alle boere geen twyfel dat boere in hul omgewing hul kennis en ervaring sal deel nie en 'n verdere 32,8 % sê boere sal dit moontlik doen.

Net 2 % meen dat boere nie bereid sal wees om te help nie en 'n verdere 3,5 % sê hulle weet nie.

Die telefoniese onderhoude is in November en Desember deur Markinor met kommersiële boere in al die provinsies buiten Gauteng, die Noord-Kaap en Noordwes gedoen.

Oor boere se geesdrif oor die toekoms van die landbou in Suid-Afrika het sowat 56 % bogemiddelde vertroue in die toekoms. Op 'n glyskaal van 1 tot 10 was 9 % uiters negatief en ook 9 % uiters positief. Engelse boere was meer optimisties oor die toekoms as Afrikaanse boere.

Op 'n vraag oor wat nodig is om 'n suksesvolle landboubedryf te verseker, het die meerderheid respondente pryse beklemtoon. Meer as 34 % het gesê beter pryse vir produkte, laer insetpryse, groter mededingendheid en 'n gunstige wisselkoers is die waarborg vir sukses.

Wat diensverskaffers betref, is goeie diens en gehalteprodukte as baie belangrik uitgesonder. Wat die Regering betref, word 'n landbouvriendelike regering as baie belangrik geag. Sowat 10 % meen die Regering se steun is onontbeerlik om 'n suksesvolle bedryf te verseker.

Buitefaktore wat uitgesonder word, is 'n gunstige klimaat, veiligheid en bestendigheid op plase.