Markontleders is teleurgesteld met die prysverloop op die tweede sybokhaarveiling van die winterseisoen in Port Elizabeth.

Volgens Sybokhaar Suid-Afrika (SSA) was pryse onbevredigend, veral in die lig van die verdere verswakking van die rand. CMW sê plaaslike verwerkers het bykans die volle aanbod opgeneem omdat daar min haar in die verwerkingslyn is en die huidige wisselkoers in hul guns tel.

Kleinbokkie- en jongbokhaar het onderskeidelik met 6,8 % en 4,7 % gedaal en grootbokhaarpryse met 5 % tot 7,5 % . Die aanbod het uit heelwat kort bokhaar bestaan, wat pryse verder benadeel het.

SSA bevraagteken die wysheid om plaaslik veilings te hou terwyl verwerkers in die Noordelike Halfrond nog nie in bedryf is nie.

Gemiddelde pryse per kilogram was soos volg (vergelykende syfers vir die ooreenstemmende veiling 'n jaar gelede verskyn tussen hakies): Kleinbokkiehaar R93,03 (R81,29); jongbokhaar R47,12 (R44,44); fyn grootbokhaar R35,12 (R35,41) en grootbokhaar R27,03 (R22,96). Die gemiddelde prys van R45,15/kg is nietemin R6, 28/kg hoër as 'n jaar gelede. Net meer as 81 % van die aanbod is verkoop. Die volgende veiling is op 3 September.

30 Augustus 2002